Hindi na natin maiaalis pa sa buhay natin ang pagbabago, lalu pa’t ang pagbabago ng mga ninuno nating unang tumapak sa lupa ang dahilan kung bakit nalagpasan ng sangkatauhan ang mga hamon ng kalikasan. Sa paglipas pa lamang ng nakaraang siglo ay kaydami na ng nabago sa buhay ng tao. Lumubog ang Titanic, namuno si Hitler, nawala si Amelia Earheart, isinilang ang rock and roll, nagbukas at nagsara ang Hogwarts at naipanganak ang isang bagay na maaaring makapagsimula ng rebolusyon sa kasaysayan: ito ang internet. Kung nababasa mo ito ngayon, mapalad ka dahil hindi mo kinailangang mabuhay noong pinapako ang mga kristyano, hindi mo kinailangang mawalan ng mahal sa buhay noong bubonic plague, hindi mo rin naranasan ang holocaust. Lalo kang mapalad dahil nasa dulo ng mga daliri mo ngayon ang traktorang magpapapatag sa ating daigdig, ang sandatang nagbibigay kapangyarihan sa maliliit na tao. Lahat ng ito ay dulot ng pagbabago, at dahil nakasabay ka, mapalad ka ngang talaga.
Ngunit dapat nating tandaan, na sa gitna ng mga pagbabagong nagaganap sa ating panahon ay mayroong paring mga taong nabubuhay ng paurong. Sa bawat taong gumagamit ng flush toilets, higit na maraming katapat na hindi man lamang nakaiinom ng malinis na tubig. Sa bawat taong namamatay dahil sa obesity, higit na marami ang namamatay dahil sa gutom. Sa bawat taong may nakasaksak na iPod sa tainga, higit na marami ang wala ng ibang narinig kundi putok ng bomba at baril ng dalawang panig na naggi-giyera. Pinapatag nga ng internet ang daigdig, ngunit nalalakaran lang ito ng mga may kayang mag-bayad. Hindi masama ang pagbabago, ngunit hindi natin dapat kalimutan kung ano at sino tayo at kung saan tayo nagmula.
Mabilis ang takbo ng tren, hindi ka niya mahihintay, kaya kung kaya mong magbayad, sumakay ka. Bihadong may mga maiiwan, ngunit hindi lahat ay kayang dalhin ng makitid at mabilis na tren. Sumakay ka sa tren at umusad ka, at sa pag usad mo, kung kaya mo ng bumili ng mas malaking tren, gawin mo. Balikan mo ang pinag-ugatan mo at isakay mo ang mga naiwanan na ng panahon.
